kan driver nen

A ri bur a, kan driver nen Taxi Driver nen chuan kan inen heu mai! Motor atanga chhuakin eng thil nge thleng hriat tumin motor hnung lam kan pan thuai a, eheu… Kan hnunga Alto car var rawn tlan chuan kan chuanna Taxi hnung lam a rawn su chu niin.

Alto Driver chuan inthiam lo takin,” Ka tihpalh lutuk, saw lai khuar saw hel ka tumna lamah ka kual sual a ” a ti a.

‘Taxi Driver chuan engtinnge a chhan ang aw’ tiin ka lo en reng a, ka rin loh dan daihin, ” A nih chu, a pawi love, engmah a chhe lo e hei” tiin a chhang a, motor-ah kan luh san a, kan tlan leh ta a.

Ka vei lama thu passenger ve tho , nu upa tawh lam chuan Driver hnenah, ” Tinge i hauh hrep loh, a number plate a per vek a, a rang nual bawk a nia, Driver mawl lutuk hi chu hrawk hrep thin tur” tiin.

Taxi Driver chuan a hla play lai chu ti zawiin, muang fan raihin ti hian a sawi a( A thusawi kha tha ka va’n ti tehlul em!)
” Nia, a fimkhur lo mah mah a nih kha, mahse min su na lova, thinrim mai lova kal tir leh mai kha tha ka ti. Ka hre reng thin, hman kumah kei paw’n Bolero ka tai palh tawh a, kha Bolero driver khan nichina ka chhan dan ang khan min chhang a, thinrim lungpuama inhauh chiam ai chuan, ” A nih chu, a pawi love, engmah a chhe lo e hei” tia a sawi kha, ka hre rei zawk asin. A tihpalh ve liau liau a nih kha”

Kha Taxi Driver kha a thinrim lo a ni lova, sawi belh tur a nei lo a ni hek lo! Kum liamtaa Driver pakhatin a chunga a tih dan angin midang chungah a ti ve a, thinrima sobut mai lovin, THATNAIN THINURNA a hneh a ni zawk. Kha Alto Driver ngei pawh kha, engtikniah emaw tuin emaw a thin ala ti ur ang a, lungpuam thinrimin thu tamtak sawi a chak hun a la thleng ang. Mahse chutiang huna a hriatchhuah leh thin tur chu ; Bolero leh Taxi Driver te tawngkam kha a ni dawn si a.

Hei hi a ni HRINGNUN PAR, mitinin kan neih vek, par chhuah tir kan harsat em em thin chu.

He khawvela kan hun leh ni te hi a rei dawn lova, Lungawilohna, Thinrimna leh Phuba lak na te nena khawhral atan chuan, a uiawm i ti ve em?

Ni e, a pawi love, i tihpalh ve liau liau a nih kha. A pawi lo inthiam lo duh suh, tu paw’n tihsual kan nei a lawm. Ka tha e, ka hrethiam lutuk che a lawm, kei chu ka na lo, nangmah zawk i na em? Ka ngaidam che, ka thiam loh zawk a nih kha. I tha em, tanpui i ngai em? Mamawh i nei em, hei hi lo ei ve rawh, hei hi i ta tur. Kal hmasak i duh em? Ti hmasa la, ka lo kian ang che, i mamawh zawk ang, ka lo pek sak dawn che emni? Keiman ka lo ti ang e, lo thu hahdam rawh……

Leave a Comment

Your email address will not be published.